【Emily】熊貓姊弟名5‧27揭盅 排隊可見面 屋企擴至高地區 助學攀山爬樹

【明報專訊】海洋公園早前為港產大熊貓龍鳳胎「家姐」同「細佬」搞命名比賽，收到超過35,700份命名建議，結果將於下星期二（27日）公布，Emily都好心急想知道呢對大熊貓寶寶會叫咩名。而喺同一日開始，訪客去「大熊貓之旅」探佢哋就唔使再預先拎時間票，可以直接喺展館外排隊。

一對龍鳳胎同埋媽媽盈盈由今年3月開始，就喺「大熊貓之旅」同大家見面，海洋公園為配合「家姐」同「細佬」嘅成長，決定將佢哋原本居住喺「大熊貓之旅」嘅「版圖」再「擴充」，將鄰近入口處嘅高地區域一併開放畀寶寶同媽媽使用，等三母子可以探索更豐富多樣嘅棲息地，學習攀爬多變嘅山坡同更高嘅樹木。

姊弟「玩具」更多

盈盈可歎me time

海洋公園公司動物及保育部主管祝效忠話，擴建係配合家姐同細佬嘅成長護理，展館中間區域會成為大熊貓嘅遊戲室，奶爸奶媽會設置更多種類嘅環境豐容物，為家姐細佬提供更多身體、感官同認知刺激；盈盈就可以喺高地區域享受一刻「me time」休息時間。