Emily Online｜ 葉太搞讀者交流會　粉絲舉牌到場兼唱生日歌 (21:03)

繼香港書展後，新民黨立法會議員葉劉淑儀今日再搞第二場「葉劉淑儀服務香港五十年」讀者交流會，葉太喺facebook話，現場大概有150人參加，大部分係來自唔同行業嘅後生仔女，仲有學生同碩士生，令葉太非常開心。

葉太又形容，佢哋嘅提問「高質」，由學術造假、高才通、本地生定義、升學，去到後生仔點參政都有，睇到佢哋關心社會時事，覺得係好現象。不過葉太話，最驚喜係有粉絲自製應援物到場，派畀現場觀眾。

今個月24號係葉太生日，佢話今日活動接近結束時，現場所有人一齊唱生日歌畀佢聽，令佢覺得好熱鬧同溫馨。