【Emily】寵物便便遍半山 民建聯倡狗廁改設計

【明報專訊】唔少市民鍾意養寵物，民建聯針對寵物隨處便溺做調查，提出多項改善建議，包括喺便溺黑點加警告牌同閉路電視、將狗廁所地面改為不鏽鋼並增設水龍頭，同埋增加寵物共享公園等。

民建聯中西區支部噚日開記者會公布區內寵物隨處便溺黑點，集中喺半山區，包括堅道、干德道、羅便臣道、樓梯街同城皇街，話過去一年收到過百宗投訴。佢哋建議政府喺黑點增設警告牌或閉路電視，並安排執法人員巡邏，加強阻嚇。

倡用不鏽鋼地面 增去水口水龍頭

民建聯話半山一帶狗廁所不足或位置偏僻，建議增加狗廁所數目，並由現時嘅沙池改為不鏽鋼地面，增加去水口同水龍頭，畀狗主冲水以免產生異味。佢哋又話，為咗配合狗嘅習性，可以喺廁所加入柱形元素。佢哋又建議改善洗街技術，例如喺洗街水加入天然除臭劑，同埋將半山區堅巷花園改為寵物共享公園，增加遛狗場地，減少狗狗喺行人路隨處便溺嘅情况。