【Emily】葉劉兩餸飯出爐 客串一日店員 話證明港人靈活求變

【明報專訊】兩餸飯自新冠疫情以來大受港人歡迎，新民黨主席葉劉淑儀噚日到沙田一間兩餸飯餐廳「客串」做員工體驗一下，佢眼見顧客大排長龍，店員忙到甩轆，認為兩餸飯喺餐飲業轉型期突圍而出，營運模式正係港人靈活求變、適者生存嘅好例子。

葉太過往不時「客串」餐飲業員工，了解業內情况，繼之前去酒樓做侍應，噚日同黨友、沙田區議員姚嘉俊到沙田一間兩餸飯餐廳「三多美食」幫手。葉太話「三多」喺2022年開業，3年間開咗5間分店，係逆市擴張，下午時分顧客依然眾多。

餸純熟 憶留學兼職中餐館

Emily睇相見到葉太𢳂飯𢳂餸手勢純熟，原來佢早有經驗。佢話早年喺蘇格蘭留學時，曾喺當地中餐館打工，但一次收錢時唔小心找多咗5英鎊畀客人，雖然店主無怪責佢，仍然覺得唔好意思，所以噚日打醒十二分精神，驚自己唔熟手。佢仲話𢳂餸時擔心畀嘅分量太多，但好彩店長話最緊要客人食得滿足，畀多啲都無所謂。

葉太體驗過後話，店內每個崗位都要經驗同技巧，每晚更會預留免費飯盒派畀有需要嘅街坊，認為敬業樂業嘅精神值得尊敬。