【Emily】YMCA搞精神健康填詞賽 黃綺琳做評判

【明報專訊】香港中華基督教青年會（YMCA）嘅義工計劃「YM Volunteer」今年推出《心．聆歌詞》填詞比賽，將廣東歌結合精神健康教育，希望以歌詞同音樂作品傳遞自我照顧、相伴同行嘅信息，喺社會傳播希望。填詞比賽正接受報名，由《填詞L》導演黃綺琳同精神科專科醫生陳啓泰擔任評審，總冠軍仲可以獲得歌曲發行機會。

總冠軍可錄歌製MV發行

比賽分為「YM Volunteer組」同「公開組」，前者為青年義工而設，仲可以參加兩場有關精神健康同填詞嘅工作坊，其中填詞入門工作坊由黃綺琳擔任導師；後者就歡迎年滿15歲嘅人參加。

YMCA話總冠軍作品可得到專業錄音、製作MV、喺Busking Night演出同歌曲發行機會。另設分組冠、亞、季軍，得獎者將獲得音樂禮券同獎座。有興趣參加公開組嘅市民可透過以下連結登記（bit.ly/samlingsong），大會將會喺11月中電郵發放比賽原創歌曲同參賽表格畀成功登記者，12月31日截止提交作品。