【Emily】記者問板球場 會後未熄咪 卓永興：幾多人玩cricket？ 楊潤雄：佢自己鍾意打

【明報專訊】噚日其中一場《施政報告》措施記者會由政務司副司長卓永興、文體旅局長楊潤雄同商經局長丘應樺主持。最後一條問題由港大學生記者發問，問到政府以咩因素決定「M」品牌活動嘅體育項目，又提到香港只有一個符合國際標準嘅板球場，問政府有無計劃加建。

楊潤雄解釋，成為M品牌項目有一系列條件，肯定會獨立檢視每個申請，又話《施政報告》已提到興建游泳館同劍擊館，政府亦會檢視唔同體育項目嘅需求同資源。

記者會宣布結束後，會場未有即時熄咪，現場直播仲收緊音，呢個時候就聽到楊潤雄同卓永興一路執嘢一路密斟，討論到港大學生記者嘅問題，卓問楊：「大佬，cricket ground（板球場），有幾多人玩cricket？」楊就答「佢自己鍾意打cricket」，之後就推開支咪，但卓似乎未意識到，再繼續講，不過就唔係好聽到佢講咩喇。