【Emily】回歸文物展開幕 林定國話舊物 「唔講大話嘅證據」

【明報專訊】香港收藏家協會喺中央圖書館展覽廳舉辦該會30周年暨慶回歸文物展覽，展出好多舊物，律政司長林定國噚日喺開幕禮致辭，用法律語言打開話匣子，話佢上庭要講證據，最重要啲證據係咪contemporaneous documented evidence（當時出現或產生，而非後加嘅證據）、係咪indisputable（無可爭議），而今次展覽嘅展品就全部都有「證據」嘅特質，唔係後加之作，亦唔係後人評論，而係實實在在嘅當時產物，係唔會講大話、不容爭議嘅「證據」。

涵滿洲國歷史文獻電車車票

今次展品包括相片、印章、獎章、瓷器、相機、錢幣、軍隊器物、官用器具、手稿、廣告等。林定國特別提到有滿洲國嘅歷史文獻及相關展品，形容係「好高層次嘅物品」，但展覽同時有好多好「貼地」展品，例如有關買賣黃金同電車車票等。