【Emily】國際創科展人頭湧湧 曾俊華話感動

【明報專訊】本港展覽業逐步復常，港府同貿發局上周喺會展中心合辦首屆「香港國際創科展（InnoEX）」，貿發局話連同「香港春季電子產品展」同「香港國際春季燈飾展」，3個科技展共吸引咗逾6.6萬名來自內地、東盟、日韓等約160個國家或地區嘅買家到場參觀同洽商，前財政司長曾俊華噚日喺facebook發文，話自己都有去國際創科展，喺會場出入口見到人頭湧湧，「因一個人多擠迫嘅環境而深受感動」。

3科技展吸引6.6萬環球買家

曾俊華又話，最近出席咗幾個有關人工智能（AI）嘅研討會，佢認為只要準確使用AI，就可造福人類，亦相信未來會因為AI多咗意想不到嘅工作機會。佢鼓勵年輕人只要跟從興趣同唔好放棄初心，「係唔需要擔心搵唔到嘢做」。

佢仲分享有一個由細睇到大嘅大學校友嘅囝囝羅振峰（Vincent）嘅經歷，話佢去咗美國大學修讀食品科學後，冇揀到相關專業嘅工作，而對娛樂圈有興趣，走咗去參加《全民造星》比賽，呢名年輕人最近仲出咗自己嘅單曲。曾俊華寄語「所有有夢想嘅年青人，繼續勇敢追夢」。