【Emily】梁繼昌「貼中」林諾奪最佳新演員

【明報專訊】「第41屆香港電影金像獎」頒獎禮噚晚喺尖沙嘴文化中心舉行，頒發19個獎項，除咗一眾演員及幕後製作人員，一直關注香港電影發展嘅立法會會計界前議員梁繼昌亦有到場睇頒獎禮，其中佢就「貼中」年僅10歲嘅林諾（Sahal Zaman）奪得最佳新演員。林諾喺《白日青春》飾演在港巴基斯坦裔難民莫青春，同黃秋生有大量對手戲。

梁繼昌噚晚喺facebook連出3帖，佢喺場外分別同男演員楊偉倫及林諾自拍，話睇好林諾攞最佳新演員，最後畀佢「貼中」，梁隨即留言話「Bingo congratulations!」（估中，恭喜晒！），睇嚟心情相當興奮。

金像獎場內一大焦點就係奧斯卡影后楊紫瓊（Michelle），佢嚟咗香港，噚晚負責頒發最佳新演員獎項。一直支持香港演員嘅文體旅局長楊潤雄亦有現身，並同Michelle握手，又同Michelle及香港電影金像獎協會董事局主席爾冬陞合照。

相關字詞﹕林諾 白日青春 文化中心 第41屆香港電影金像獎