【Emily】「國安教育日」播反修例片 叫議員留時間

【明報專訊】聽日係全民國家安全教育日，據Emily了解，政府今日會舉行「全民國家安全教育日放映會」，邀請一眾政府高層官員、行政會議非官守成員同立法會議員參與，觀賞同反修例運動相關嘅影片。主辦方面提供兩個時段，分別係下午4點半同傍晚6點，為時都係一個鐘，分別由保安局長鄧炳強同政務司長陳國基主持。

港澳辦主任夏寶龍近日訪港，唔少立法會議員收到通知，要預留今日同周日嘅時間，但未知所為何事，議員之間估計係咪會見夏寶龍。不過謎底好快揭開，其實係要為放映會預留時間，最終夏寶龍會唔會出席就暫時無人知。

有獲邀者向Emily講笑話，雖然無話一定要出席，但就叫佢哋喺兩個時段二選一，無「缺席」呢個選項喎！