【Emily】大嘥鬼、阿德「踩過界」 伙蔡若蓮為考生打氣

【明報專訊】中學文憑試（DSE）筆試今日開考，相信唔少考生都有少少緊張。教育局長蔡若蓮噚日喺facebook發帖，話請咗兩位「份量十足」嘅嘉賓為今屆考生打打氣，原來就係政府吉祥物大嘥鬼同清潔龍阿德，佢哋仲拍片幫考生加油，見到影片開頭清潔龍阿德問大嘥鬼「我哋有冇嚟錯地方，呢度係教育局」，而大嘥鬼仲搞笑咁話「我特登將平時嘥咗嘅氣帶埋嚟，為考生打氣」。蔡若蓮祝福考生考到理想成績，亦提醒佢哋要記得注意休息同健康。

警吉祥物提醒預夠時間去試場

另外，警方噚日都喺facebook同Instagram發帖為考生加油，吉祥物「熊sir」提醒考生，除咗要準備准考證、身分證、文具等，仲要預留足夠時間到達試場，「咁樣就無咁緊張啦！」熊sir又話，文憑試當日交通會比較繁忙，加上近日天雨關係，提醒考生記得去試場前要留意最新交通消息。另一吉祥物「提子」就去咗文武廟，話祝考生金榜「提」名。