【Emily】調查：粵劇觀眾多年長、女性、非在職 教大學者倡提高演出質素、縮短劇目

【明報專訊】教育大學粵劇傳承研究中心噚日公布「香港粵劇觀眾觀劇動機普查」研究結果，發現主要嘅粵劇觀眾群係年長、女性、非在職嘅人，又話觀眾買飛欣賞粵劇演出嘅頭4項主要動機，依次係表演質素、表演內容、個人興趣、環境。如果按年齡組別劃分，30歲或以下受訪者首要考慮表演內容，其次係表演質素同票價；31至59歲及60歲或以上受訪者都係以表演質素為最優先考慮。

六成無觀劇習慣 一成每月最少4次

中心獲大學教育資助委員會研究配對補助金計劃資助，舊年年初訪問咗3447名市民，了解佢哋觀看粵劇演出嘅動機同誘因，以及對粵劇嘅喜好，發現過半數受訪者（57%）無睇粵劇嘅習慣，33%每月睇1至3次，約一成受訪者每月睇4次或以上。

教大粵劇傳承研究中心總監梁寶華相信，唔少有睇粵劇嘅市民都希望支持香港粵劇發展，建議演員同埋班主應該提高演出質素，考慮縮短劇目演出時間，當局都要着力改善演出環境，吸引觀眾，相信咁樣先至可以協助粵劇傳承，開拓新觀眾群。