【Emily】長毛67歲生日 旁聽市民送祝福

【明報專訊】正在獄中嘅立法會前議員「長毛」梁國雄，噚日（27日）67歲生日，多名戰友向佢送上祝福。長毛噚日上庭就民主派「35+初選案」受審，散庭後其太太陳寶瑩、前民陣召集人陳皓桓等均向佢揮手並祝佢生日快樂，梁國雄離開法庭前回頭微笑回應。

梁國雄因為民主派初選案被控，案件噚日續審。多名旁聽市民散庭後向喺正日生日受審嘅長毛送上祝福，有一個小女孩高聲喊「毛伯伯生日快樂」，亦有旁聽者高喊「身體健康」，長毛均有微笑回應。

陳皓桓吳文遠等fb發文祝賀

另外，陳皓桓噚日喺facebook上載同長毛嘅合照，祝福對方身體健康同生日快樂，並引用《國際歌》歌詞話「英特納雄耐爾（指國際共產主義）就一定要實現」。社民連前主席吳文遠亦喺facebook發文，祝福長毛67歲生日快樂，佢話今年係長毛第三年於獄中度過生日，呼籲大家寫信寄畀長毛。民主黨前主席劉慧卿亦有發文祝長毛生日快樂。

相關字詞﹕社民連 民主派初選案 梁國雄 長毛