【Emily】搜救犬公幹立功 獲特首「宴請」

【明報專訊】上個月去咗土耳其幫手震後救災嘅兩隻消防搜救犬Twix同Umi，已經完成檢疫程序，身體檢查結果好理想，可以繼續執行職務。特首李家超噚日喺facebook出帖，話「宴請」咗Twix、Umi同Umi嘅姐姐Uma到禮賓府，仲以佢哋最鍾意嘅零食招待，以答謝同表揚佢哋喺救災中嘅付出同出色表現。特首並上載影片，可以見到3隻狗狗好黐人，令佢忍唔住話「?到我個心好甜呀」，仲透露以前養過狗，話係一段好開心嘅經歷。

李家超話，3隻狗狗都好活潑好動，佢哋喺草地時表現得好興奮，其間Twix突然翻肚討摸，可愛模樣?到大家好開心。佢話，狗狗除咗係人類嘅好朋友，都係「我們合作無間的工作拍檔」，本港紀律部隊等政府部門現共有超過340隻工作犬，協助部門人員執行巡邏、調查、緝毒、搜索等工作，希望借今次機會，向一直默默守護大家安全同城市治安嘅領犬員同狗狗，表達最衷心嘅感謝。

唔少網民乘機留言，請特首多關注香港狗狗以及動物權益，仲有唔少人要求善待工作犬及狗狗嘅退休安排。

相關字詞﹕李家超 消防處 土耳其地震