【Emily】框框轟轟颯颯砰砰 鄧炳強「多聲道」介紹裝甲車

【明報專訊】保安局長鄧炳強噚日喺facebook上載咗條片，介紹新一代國產裝甲車「劍齒虎」。鄧炳強話，全車車身精鋼製作，前後左右包埋玻璃都可防彈，敲落車身「框框聲」。鄧話，劍齒虎裝有同一時間可發15粒催淚彈或防暴彈嘅多孔發射器，打出嚟「轟轟聲」，仲有可360度旋轉嘅紅外線鏡頭，「600米以內暴徒個樣全部都『颯颯聲』影晒出嚟」，而防爆車胎即使被磚頭同汽油彈丟到「砰砰聲」都一樣行到。鄧最後號召想同劍齒虎並肩作戰嘅人「嗱嗱聲」加入警隊。