【Emily】13項私人物業獲「最佳園林」金獎 屋苑科技護園林 出動航拍感應器

【明報專訊】康文署每兩年舉辦一次嘅「最佳園林大獎」因疫情延期，事隔4年回歸，噚日舉行2022年度頒獎禮，共有13項私人物業獲金獎。康文署總康樂事務經理（綠化運動）戴婉君話畀Emily聽，今年不少項目不單有特色園藝，仲喺園林設計及園藝保養上採用新技術，包括難度更高嘅「垂直綠化」、用航拍機勘察植物及傳感器監測樹木穩定等，仲話見到有屋苑使用傳感器監察樹木感到意外，指政府已大規模使用呢項技術，但私人物業始終面積小，料成本唔低，樂見環保與可持續發展成為一個趨勢。