【明報專訊】仲有兩星期就過年，來年係「馬」年，九巴推出兩架以「馬」為主題嘅巴士，寓意「好運加馬」，一架係傳統雙層巴士，行走來往天水圍同西九高鐵站嘅69X線，另一架係開篷巴士，行走旅遊路線HK1。
九巴話因為好事要成雙，所以今次「加馬」推出兩部馬年生肖巴士，69X線嘅一部以綠同粉紅做主色，希望帶出春回大地感覺，而HK1嘅一部就以傳統代表喜慶嘅紅色同橙色做主調。兩部巴士都會有金馬、元寶等圖案，寓意瑞馬迎春 。
今日70巴士總站派揮春
另外，今日起九巴會喺全港70個大型巴士總站同客務站免費派發「好運加馬」、「喜氣盈門」嘅馬年揮春，九巴話市民可以拎住揮春，將馬年嘅福氣帶返屋企。
