【Emily】撞人大常委會 李慧琼缺席立會

【明報專訊】人大常委會今日臨時加開一日會議，同立法會大會「撞期」。身兼全國人大常委嘅立法會主席李慧琼（Starry）向Emily證實要赴京開會，今次將係佢上月擔任主席以來，首次「撞期」開唔到立法會大會。

陳振英何君堯代主持

Starry話日前接到通知，要出席加開嘅人大常委會特別會議，所以今日嘅前廳交流會同立法會大會，將由內會正副主席陳振英同何君堯主持。今次前廳交流會係新一屆立法會嘅第一場，由財政司長陳茂波率領官員出席。至於大會，Emily聽聞處理完民建聯陳勇提出有關北部都會區嘅議員議案後會暫停，據悉係因為全體議員獲邀出席「重要活動」，夜晚去中聯辦酒會。

人大常委會一般每雙數月份嘅月底開會，每次為期幾日，今次就加開一日特別會議。新華社前日報道，全國人大委員長會議決定2月4日喺北京舉行人大常委會第二十次會議，建議審議人大常委會代表資格審查委員會「關於個別代表的代表資格的報告」。

人大常委會議臨時加一日

睇番資料，第十四屆人大常委會對上一次加開會議，已經係2023年7月審議免去秦剛嘅外長職務。Starry先前喺立法會主席論壇上話，一年可能有4次人大常委會議同立法會重疊，不過如果有重要議題，一定留番喺立法會。