【Emily】因個人計劃需暫離港 甄拔濤辭任兆基校長

【明報專訊】直資學校香港兆基創意書院近年幾經換校長，前年4月搵嚟著名劇場編劇兼導演甄拔濤（圖）做署任校長。不過，書院上個禮拜喺facebook話請校長，消息引來舊生以至劇壇關注，唔少人感到突然。甄拔濤前日喺網上出帖，提到上月16日已經係佢喺書院嘅「last day（最後工作日）」，離職係因為有個海外個人計劃，「個人及工作計劃，需要離港半年左右」。

甄拔濤前日（1月31日）出帖，提及其實早喺上年12月中已向校董會請辭，又話last day正值書院人類（該校師生以「人類」互稱）嘅project week（作品周），「從眾多作品中看到一個個認真思考、創作的靈魂」。

甄拔濤話「離別當然有着種種不捨」，佢收到好多書院人類甚至家長嘅祝福，鼓勵佢向下一階段進發，佢深信書院亦會發展得愈來愈好，希望「有勇有熱誠的有志之士」把握機會應徵做校長。