Emily Online | 大律師公會擬向資深大律師夏偉志頒終身會員 (21:19)

大律師公會歷來會向有傑出貢獻嘅法官或大律師頒授終身會員或終身榮譽會員資格，公會今日（29日）向會員發通告，預告喺下月下旬召開特別會員大會，建議向資深大律師夏偉志（Graham Harris）頒授公會終身會員，以表揚佢對大律師公會同香港司法公義嘅貢獻。

呢項動議由刑事大律師俗稱「四大天王」嘅其中兩位資深大律師清洪同駱應淦，同埋多位前任大律師公會主席石永泰、譚允芝、林孟達、杜淦堃、現任主席毛樂禮等一齊提出。

Graham係刑事法專家，曾經喺多宗刑事大案擔任辯護律師，求學時醉心戲劇嘅佢，喺行內以擅長求情見稱。佢2011年獲頒授資深大律師資格，時任終審法院首席法官馬道立喺儀式上話，問過幾個人都話Graham早就應該申請做資深大律師。佢歷年代表公會出席立法會司法及法律事務委員會回應刑事法律議題，亦曾是法律界選委。