【Emily】田北辰「突襲」莊豪鋒 慶生兼點評

【明報專訊】實政圓桌莊豪鋒（Mark）「繼承」田北辰嘅立法會新界西北議席，亦繼承咗其議員辦公室，前日田二少趁Mark開立法會大會時「突襲」，去立法會提早為佢慶生，Emily就留意到，議辦擺設變動不大，牆上掛住「田叔叔英語閱讀計劃」感謝卡、「無愧」題字等，原封不動。

田二少雖然卸任立法會議員，不過都「𥄫實」接班人莊豪鋒表現，佢話當日「舊地重遊」，適逢Mark就住「促進陸路跨境交通」議員議案發言。田二少就點評Mark講嘢比選舉時進步唔少，不過5分鐘發言時間只用咗4分半，「白白浪費咗」30秒，比着自己一定「即場爆肚，用盡啲時間」，但都話Mark嘅台型同眼神接觸都唔錯，但一定要繼續努力為民發聲。