【Emily】Harry Potter助盧煜明解難研究 文字「飛出銀幕」想起染色體

【明報專訊】人要有創新，往往可能需要唔同嘅啟發同刺激，中文大學校長盧煜明近日接受商台節目《又係時候同一天講再見》訪問，提到自己有兩項重大研發源自「生活靈感」。佢舉例曾用3年時間都破解唔到「胎兒全基因組圖譜」，直至喺戲院睇3D版《哈利波特：混血王子的背叛》，見到「Harry Potter」文字「飛出銀幕」，當中「H」字嘅兩豎令佢諗到兩條分別來自父親及母親嘅染色體，最終用3分鐘就破解咗困擾佢多年嘅難題。

盧煜明又鼓勵科研人員唔好着眼喺最後嘅結果，就好似睇劇咁，「唔好剩係睇最後一集，其實過程係最worthwhile（值得）。同埋，有啲嘢好似唔work（行得通），可能係因為時辰未到，等足夠時間可能都會work」。

商台噚日發放節目預告片，主持陳志雲問盧煜明最鍾意聽邊首流行歌，盧就話最近幾鍾意聽林家謙嘅歌，但再追問佢邊首特別印象深刻，盧煜明起初答唔到，話「要諗諗」，最後片尾佢補答係〈秋葉緣〉，話頭先醒唔起係因為陳志雲問得太突然。