【Emily】科大聘醫學院長 需有全球聯繫人特質

【明報專訊】科大籌備緊新嘅醫學院，Emily留意到校方呢幾日喺報章、國際期刊及招聘網站登廣告請創院院長。院長第一個任期一般5年，雙方同意下可以續多一任；新任院長將會向首席副校長匯報。

招聘廣告形容，首任院長有「歷史性機會」建立醫學院，並負責招聘教員，同政府、各教學醫院、業界同全球醫學界建立策略伙伴。候選人必須係正教授資歷嘅傑出學者，註明要具備全球聯繫人（global connector）特質，最好有喺複雜醫療體系中工作嘅經驗等。

廣告話人工有競爭力，但無講幾多錢，而校方已請咗獵頭公司，申請人或提名人要提交願景陳述、履歷同3個推薦人。

Emily留意到，科大醫學院呢兩個月已開始請緊教授、臨牀教授同辦公室大小職員，其中臨牀教授需要有本地醫學執業同專科資歷，教授就需要喺生物醫學、解剖學、生物化學、免疫學、藥理學或生理學6個相關範疇有博士學歷。招聘網頁提及，副教授或助理教授一般係3年合約制，可以續約。