【Emily】傷健共跑嘉年華 善款180萬新高

【明報專訊】近日天朗氣清，唔少團體都喺假期搞運動活動，國際獅子會中國港澳303區噚日喺大埔香港科學園長廊舉行慈善跑及傷健共融嘉年華，活動有唔少輪椅人士及視障人士參與，參加者有2000人，話活動籌款額創新高，有超過180萬元。

主辦單位話，活動秉承「手牽手肩並肩」精神，呼籲社會多一點包容多一點鼓勵，為共融社會注入更多意義。活動中領跑員對殘障參加者沿途照顧，其中香港長跑好手姚潔貞，就代替早前喺渣馬受傷嘅丈夫陳家豪參加活動，擔任視障領跑員。

喺九龍區噚日就有「中銀人壽圖入城野定向挑戰賽2026」活動，吸引1500人參加。賽事以懷舊九龍為主題，參加者要穿梭黃大仙、深水埗及九龍城，以定向方式探索社區歷史、文化與自然景觀，體驗「無處不旅遊」。活動為香港青年獎勵計劃籌得60萬元經費，民青局長麥美娟現身支持。