【Emily】陳家珮「失眠腳軟」 缺席慈善跑

【明報專訊】「恒基╳博愛中環海濱慈善跑2026」噚日喺中環海濱舉行，為「博愛醫院屯門藍地長者護理及護養安老院舍項目」同「大埔火災重建及支援項目」籌款。原定參與1公里「領袖盃」賽事、日前因逆線行車惹議嘅立法會港島西議員陳家珮未有現身，佢向傳媒解釋因為近日事件而失眠「腳軟軟」，事前通知咗主辦方無法出席。

唔少立法會議員參與「領袖盃」，包括身兼恒基地產執董嘅地建界黃浩明。傳媒問到陳家珮事件時，黃浩明覺得對方已適當道歉，又相信作為公眾人物議員要時刻警惕；同場嘅九龍西議員梁文廣就話希望市民將焦點放番喺議會工作上。

今年賽事有超過5000個跑手參與，主辦亦邀請特殊學習需要學童、視障跑手同領跑員、長者同近30個輪椅選手參賽，並增設1公里輪椅體驗組。文體旅局長羅淑佩喺起步禮致辭介紹，賽事路線途經中環心臟地帶多個景點，包括中環海濱賽道；佢又預告一系列體育盛事會接踵而來，如「浪琴香港國際馬術盛典2026」、「世界桌球大獎賽」等。