【Emily】休假兩日復工 何永賢「找數」出帖講安老 同僚畀like

【明報專訊】近日有消息稱短期內離任嘅房屋局長何永賢，上周四（22日）發文介紹長者安居設施，文末預告「稍後」再分享更多局方關心長者嘅工作。經過兩日因家事休假，噚日復工嘅佢就喺社交媒體「找數」，分享房屋署支援同便利長者措施，更承諾局方會同相關部門努力為「老友記」服務。帖文一出，文體旅局長羅淑佩、副房屋局長戴尚誠、關注房屋政策嘅立法會九龍西議員梁文廣等人都有畀like。港台主持車淑梅就留言讚何「好有心！支持支持！！！」。

何永賢喺文中列舉多項服務，例如屋邨管理人員會主動上門探「單老」同「雙老」住戶，又建立咗試點對比機制，由去年7月至12月底，關愛隊接觸同探訪超過2.7萬個住戶；另外今年度「邨『友』好事」將支援長者納入重點項目。政策方面佢介紹政府有「高齡單身人士」、「共享頤年」、「天倫樂」優先配屋計劃，以及「家有長者優先選樓計劃」等。

羅淑佩副局梁文廣畀like

文末何永賢總結，更多「以人為本」嘅服務對長者安居好重要，局方未來會同相關部門一齊努力，用心為「老友記」服務。不過佢今次就無預告之後會分享咩政策。