【Emily】大律師會換屆 毛樂禮連任主席 義助宏福災民 300大狀就位

【明報專訊】大律師公會噚日舉行周年大會，主席毛樂禮（Jose）同副主席許紹鼎（Martin）及薛日華（Eva）喺無懸念下連任。 Jose同公會領導層見傳媒時話，佢哋嘅法律義助計劃已召集咗300幾個大狀，當中仲有資深大狀，大家都願意幫助大埔宏福苑大火災民或其他市民，提供義務法律服務。

公會早前喺大埔宏福苑火災後成立小組，已開始研究圍標等多個法律議題，不過要等埋政府成立嘅獨立委員會出咗最終報告後，小組先會公布研究結果同建議。Jose解釋，咁樣做係為免同其他人做緊嘅嘢重疊，佢哋亦希望知道政策大方向後，再提供法律同技術意見。

設小組研AI 冀大眾勿政治判斷法治

各行各業都關注人工智能（AI）應用及潛在影響，公會將成立小組研究AI，Jose話小組會研究包括AI喺社會上應用、版權、使用者責任，同埋點樣規管等議題，希望推動香港邁向AI時代。

本港法庭審理涉國安大案一單接一單，繼日前法律年度開啟禮致辭後，Jose再話司法機構近年面對愈來愈多同埋明顯嘅攻擊，呼籲社會唔好用政治眼光判斷法治，令「司法回歸司法」。