【Emily】同梁愛詩彭韻僖對話 大馬前女大法官：要勇於判決

【明報專訊】家家有本難念的經，舊年退休嘅馬來西亞首任女性最高法院首席大法官東姑麥潤（Tun Tengku Maimun binti Tuan Mat）話，在任期間鼓勵法官勇於判決，自己雖然係首席大法官，都係得一票，其他法官睇完法律同案情，可以有唔同嘅判決。

東姑麥潤噚日同律師會喺中大合辦研討會，跟香港首任律政司長梁愛詩、律師會首名女會長彭韻僖及現任會長湯文龍對談。東姑麥潤話，初上任時法院面對公眾信任危機，質疑法院係唔係司法獨立，或太順從行政機構。佢上任後決定以重拾法院形象同公信為重，表明以判決維護憲法權威。

「無論幾政治化，判案只顧法律」

東姑麥潤話任內鼓勵法官勇於判決，唔使擔心同自己唔同判法。佢話種族同宗教係大馬兩大敏感議題，法庭無論點判，公眾都有反應，不過佢在任期間一直鼓勵法官唔好理公眾意見或情緒，「無論案件幾政治化或涉及宗族宗教，判案時只考慮法律同案情」。

佢又話，一直提醒法官誠信唔止係免於貪腐，而係即使無人睇住、無人知時，仍然要做正確嘅事，「說『好』可能係容易嘅選擇，但要有勇氣說『不』」。