【Emily】引無人機巡高壓燃氣管道 煤氣職員「慳啖氣」

【明報專訊】煤氣公司最近引入無人機巡查戶外高壓燃氣輸送管道，以更快、更準確掌握管道嘅最新狀態，盡早發現破損，及時修復。煤氣公司助理總經理（輸氣操作）許庭茵話，以往每次做管道檢查要3個工程人員一組，以川龍至大欖一段路線為例，喺山上沿管道步行檢查約需16小時，要分兩日完成，引入無人機後，工程人員就可以專注做其他事。

煤氣公司話，管道巡檢無人機具備激光氣體檢測功能，配以3D地形比對技術，可以喺空中沿管道路線監測，一旦發現氣體泄漏就即時報告，可以隨即安排維修。

任職輸氣操作部系統維修組嘅陳廸奇話，用無人機之前，除咗要親身沿管道巡查，亦要最少每3個月沿管道檢測「陰極防蝕設備」，以勘察地下管道狀態，遇到打風、黑雨更要去現場做額外檢測。