【Emily】宏福苑再搵到貓貓 愛協尋主人

【明報專訊】大埔宏福苑大火發生至今一個半月，繼早前透過捕貓籠搵番兩隻奇蹟生還貓貓，愛護動物協會前日朝早喺宏盛閣低層再透過捕貓籠搵到一隻本地短毛貓，不過愛協話宏盛閣無登記嘅失蹤貓貓個案，所以未知貓貓係有主人定係流浪貓。愛協話貓貓身體狀况正常，喺青衣中心休息緊，暫未有人認領，已將貓貓相片傳畀曾報失貓貓嘅主人，睇下有無人認得。

至於喺元旦獲救、奇蹟生還嘅貓貓「細佬」，獲救時因為太驚，喺籠入面撞到頭同腳都損晒，主人羅太噚日同Emily講，雖然細佬已經離開災場兩個禮拜，但身體情况一直唔太好，可能因為身上有傷口發炎，一直食唔到嘢，無乜精神又肚屙，上星期送咗細佬去愛協動物醫院，情况都無好轉，服用抗生素同益生菌都唔太見效，體重亦下跌。

獲救「細佬」病重入院 主人盼集氣

羅太慨嘆醫生都好似束手無策，佢見到細佬咁樣都好心痛，希望大家為細佬集氣，祝細佬早日康復。