【Emily】3銀行2‧3起可換新鈔 1‧27起供預約

【明報專訊】仲有個幾月就到農曆新年，金管局同3間發鈔銀行公布，將會喺2月3號（周二）至16號（周一）提供新鈔同「迎新鈔」畀市民兌換。今個月27號（周二）起可以喺網上預約，銀行下星期會公布詳情。

3間發鈔銀行匯豐銀行、渣打銀行同中銀香港將同步提供換新鈔服務，同時提供「迎新鈔」，即係雖然舊但仍簇新嘅鈔票，金管局話都適合封利市。喺開始換鈔嘅頭3日銀行會提早開門，朝早8點起營業，專門提供換鈔服務，而銀行亦會實施人流管理措施，例如有需要時向排隊輪候嘅市民派籌及安排分流。

金管局建議需要用現金派利市嘅市民，去銀行換鈔前先睇吓屋企有無剩餘新鈔或「迎新鈔」，同時鼓勵大家派電子利市，並預告主要銀行同電子支付營運商會推出唔同推廣計劃，鼓勵市民派發電子利市。