【Emily】江旻憓有樓出租 任馬會顧問受薪 樓家強最多物業冠「新丁」 黃浩明任84公司董事

【明報專訊】新一屆立法會今日首次開會，今屆焦點之一係奧運金牌得主江旻憓（Vivian）「轉跑道」，由運動員變成旅遊界議員。Emily連日翻查全部90名議員嘅利益申報，Vivian申報自己喺新界有個住宅物業出租，並喺「受薪僱傭關係」一欄申報為賽馬會顧問，意味佢出任顧問係有薪金。

綜合已上載立法會網站嘅議員利益申報，40名新丁議員中，選委界別議員樓家強持有最多物業，喺內地擁有23個車位同23間商舖投資；另一選委界別議員文頴怡有8項物業，包括喺香港有一個商業物業、兩個工業物業、一個自用車位、一個工業舖位，喺澳門同內地共有兩個住宅同一個車位。

受薪董事方面，地建界議員黃浩明申報為84間公司受薪董事，全部同地產相關，另外申報喺日本有一幅空置土地作投資，於香港就喺葵涌有兩個自住單位同一個工廈單位投資。

陳曉峰選舉收自由黨20萬捐款

截至噚晚6點，有4個議員申報有收取選舉捐贈並列明金額，最多係法律界陳曉峰，佢收到自由黨捐贈20萬元；另外3人都係經民聯議員，包括工業界（第二）吳永嘉同選委界梁美芬，分別收取1578.57元同1678.57元捐款，而商界（第一）林偉全獲經民聯同甲級能源有限公司嘅捐款，合共2498.57元。另外仲有6名議員嘅利益申報未完整上載到立法會網站。