【Emily】港專培訓高中生 教長者用跨境出行App

【明報專訊】近年唔少長者北上求醫。香港專業進修學校（港專）培訓咗一班高中學生，由學生教長者義工用跨境出行電話應用程式（App），例如喺內地搵出行路線同電子支付等，再由長者義工傳授知識畀其他老友記。

港專獲社署沙田區福利辦事處資助，聯同基督教聖約教會耀安長者鄰舍中心及中華基督教會方潤華中學，推行「沿途友里．結伴『行』」計劃，港專透過計劃培訓高中生，學生都係就讀中華基督教會方潤華中學嘅「樂齡科技與服務」應用課程，再由佢哋教約30名長者鄰舍中心嘅義工。

長者學員BoBo形容學習過程最珍貴係「人情味」，因為有後生仔女陪長者學用App，並認為自己𠵱家能夠應付喺內地出行嘅基本需要。港專團隊同時製作咗教學短片，將會陸續喺唔同嘅安老服務機構及照顧者資源中心播放，希望令其他長者受惠。