【Emily】啟德大道四周 盡覽港屋大雜燴

【明報專訊】政府近年透過推動多項措施，鼓勵市民循房屋階梯上進上流，估唔到啟德發展區內有一個小小地方，可以畀公眾一次過睇到多種唔同類型嘅住宅項目，唔講仲以為自己身處房屋博物館。

話說Emily早兩日到啟德探朋友，經過鄰近啟德車站廣場嘅啟德大道公園兒童遊樂場，抬頭一望發現，原來呢度可以見到私人屋苑「啟德一號」、公屋「德朗邨」、居屋「啟朗苑」、過渡房屋「啟德‧東寓」；再望遠啲，可以見到由市建局起嘅港人首次置業先導項目「煥然壹居」。

不論私樓、居屋、公屋、過渡屋同首置盤都可以喺呢個小空間見到，大部分一街之隔，朋友講笑話當呢度係「高級版嘅將軍澳」。不過，有住將軍澳嘅朋友話港鐵寶琳站C出口外亦有多種住宅共冶一爐，左右兩邊望到租置公屋「寶林邨」同「景林邨」，居屋「英明苑」、「欣明苑」；前後係私人屋苑「新都城中心」，望遠啲仲有房協出租屋邨同資助出售屋苑「茵怡花園」、夾屋「叠翠軒」𠻹。