【Emily】防骨質疏鬆 團體幫500市民檢查

【明報專訊】香港人返工忙碌，成日坐喺辦公室，少運動，飲食又唔均衡，骨質易愈嚟愈脆弱，容易有骨質疏鬆。香港壽臣山獅子會噚日喺大埔嘅香港教師會李興貴中學舉行一年一度大型骨骼檢測日，並為頭50名重症患者免費提供被形容為「量度骨質疏鬆天花板」嘅骨密度檢查，令佢哋及早獲得適當診斷。

活動亦即場為超過500名50歲以上市民做檢查及舉行健康講座，並首次結合智能3D姿勢技術及全方位身體姿態透視技術，分析檢測骨骼結構、肌肉張力及運動姿勢，令參加者深入了解點樣預防同保護骨骼健康。

骨科醫生、全國政協常委高永文出席活動時話，骨質疏鬆屬「無聲疾病」，無明顯徵狀，但會帶嚟嚴重後果，例如骨折，佢建議更年期後嘅女性要定期檢查，60歲以上男性都要驗一驗，平日多攝取高鈣食物，並可透過練氣功、打太極等增強骨骼。