【Emily】年年考第一 運物局馬富威做元朗DO

【明報專訊】政府噚日公布，運輸及物流局首席助理秘書長馬富威（圖）今日起出任元朗民政事務專員（DO），接替2021年就任嘅胡天祐。馬富威2011年加入政務職系，喺多個政策局同部門工作過，包括前民政局、前運房局、勞福局同行政長官辦公室。睇番2008年《文匯報》嘅一篇報道，馬富威係聖芳濟書院學生、高考5優狀元，當時報道話佢自小年年考第一，平時上課唔特別認真，甚至認為高年級嘅課程「好無聊」，但為咗高考都唔敢怠慢，備試期間每日溫習七八個鐘，報道中佢話自己「從來不和同學一起溫習，因為團體學習很容易分散精力，效果並不好」。

至於離任嘅胡天祐就喺2008年加入政務職系，曾服務政制及內地事務局、環保署同民政總署。

政府日前先公布，時任財經事務及庫務局首席助理秘書長（財經事務）李家維喺上周四接任余健強，成為油尖旺DO；余健強就升任環境及生態局副秘書長。改制後，DO兼任埋區議會主席。