【Emily】霜凍警告連發 粉嶺植物結霜

【明報專訊】天文台連續兩日發出霜凍警告，繼前日之後，噚日下畫4點幾再發警告，提醒農友同市民今朝新界內陸可能出現地面霜。天文台喺facebook專頁話，由於噚晚風勢弱，輻射冷卻尤其明顯，預計今早新界部分地區氣溫顯著較低。帖文配上多張網民提供嘅相片，顯示噚日朝早喺大埔、粉嶺等地方都有結霜。

網民郭小姐噚日朝早6點半到粉嶺丹竹坑拍攝多張結霜相片，佢向Emily形容當時未算好夠凍同濕，所以結霜只喺小量雜草嘅邊緣出現，佢預計輻射冷卻情况如果更明顯，今朝植物可能出現「霜害」。

另外，天文台噚日發稿總結舊年嘅天氣，話全年有14個熱帶氣旋引致要掛風球，係長期年均約6個嘅兩倍以上，亦係自1946年以來最多。雨量方面，由於7至9月連場大雨，全年總雨量2558.7毫米，較1991至2020年正常值2431.2毫米多約5%。舊年天文台亦發出咗16次紅雨同5次黑雨警告，兩者都打破各自嘅全年紀錄。至於氣溫，舊年酷熱天氣有53日、熱夜有54日，係有紀錄以嚟第三多。