【Emily】《提子動畫廊》講跨境詐騙 配AI版劉頴匡被捕相

【明報專訊】警方星期一（5號）喺YouTube上載《提子動畫廊第五季》，其中第五集「終極對決，護港安國」提到，警方拘捕多人涉嫌多次通過社交平台發布煽動及虛假信息，違反國安法，另外聯同多國警方開展打擊跨境詐騙犯罪行動，瓦解多個跨境詐騙集團網絡，影片仲疑似用咗人工智能（AI）生成圖像，模擬拘捕犯人畫面，但就熟口熟面。

因初選案被控串謀顛覆國家政權罪嘅劉頴匡，前年判囚4年5個月，佢嘅女友黃于喬（Emilia）噚日喺社交平台Threads話，影片其中一張圖像係劉頴匡2021年被捕嘅場面，相片仲係佢當日拍攝嘅，形容警方「真是懂黑色幽默」，以劉頴匡嘅配圖講跨境詐騙。Emilia仲話，另一張圖像係同一案件被判囚4年6個月嘅岑敖暉喺2021年被捕嘅畫面。