【Emily】首個返學日中九繞道 官員mon實

【明報專訊】中九龍繞道（油麻地段）通車兩星期，之前係學校假期，路面較少車，噚日係繞道通車後首個返學日，運輸及物流局常任秘書長丘卓恒及運輸署長李頌恩朝早去到運輸署緊急事故交通協調中心，視察繁忙時段嘅行車狀况。丘卓恒話，透過閉路電視實時觀察，見到繞道暢順，情况符合預期。至於原有道路如龍翔道、加士居道等，署方話喺噚日整體車流量較高嘅時段，交通都較以往暢順，反映新路有效分流東西九龍之間嘅交通；西九龍公路南行及繞道嘅支路噚日朝早行車情况亦理想。

運輸署話會繼續監察繞道及連接道路嘅交通情况，確保交通暢順。運物局日前話，繞道上月投入服務，每日約有50,000車次使用，會力爭繞道所屬嘅6號幹線餘下路段喺今年內開通，屆時整條6號幹線開通後，繁忙時段往來將軍澳市中心及油麻地嘅行車時間將由約65分鐘大減至約12分鐘。