【Emily】短吻果蝠闖校園增 嘉道理籲勿趕走

【明報專訊】短吻果蝠係香港兩種果蝠之一，亦係香港市區出沒嘅哺乳類動物，但佢地晝伏夜出，唔係咁易見到廬山真面目。嘉道理農場暨植物園喺facebook發文，話近呢3個星期接到3宗關於短吻果蝠進入校園嘅求助個案，牽涉約30隻短吻果蝠，部分受傷。

附近屋苑修剪蒲葵 果蝠失家園

園方話，所有蝙蝠都受《野生動物保護條例》保護，任何騷擾、破壞棲息地，導致動物受傷嘅行為都係犯法，公眾若發現蝙蝠喺屋苑、學校外牆或建築物內，應畀佢哋留喺原處，通常佢哋係搵緊新家園，幾日後會飛走。

嘉道理接到嘅求助個案中，有兩宗喺同一地點，嗰度係兩間相鄰嘅學校；團隊到場觀察後，發現校園雖然無短吻果蝠常棲息嘅蒲葵樹，但附近一個私人屋苑內就有3棵被大幅修剪嘅蒲葵樹，相信短吻果蝠因為修樹而失去家園，令佢哋要去附近建築物搵臨時安身之所。

園方仲話，市民可能對蝙蝠有負面印象，但其實佢哋喺生態系統中擔當咗非常重要嘅角色，唔少植物靠果蝠傳播花粉同種子，食蟲性蝙蝠亦會捕食大量蚊蠅等害蟲。