【Emily】超級月亮今晚現身 跟住仲有流星雨

【明報專訊】啱啱踏入2026年，大家即有機會觀賞明亮滿月。新華社報道，今年首個「超級月亮」將喺今晚6時03分現身夜空，今次係連續第四個月出現超級月亮，如果錯過就要等到年底12月先見得到。

中國天文學會會員兼天津科學技術館天文科普專家劉仲利話，2025年有3次超級月亮，分別喺10月、11月同12月，今年就有2次，分別喺1月3日和12月24日。其中12月超級月亮會係年度最大滿月。

另外，聽日清晨天空會迎嚟今年首場流星雨——象限儀座流星雨。內地媒體話，喜歡流星雨嘅朋友可以喺3日夜晚至4日清晨觀測。台灣中央社就話，象限儀座流星雨喺4日達極大期，但當晚月相近望，雖然預計每個鐘天頂流星數達80顆，喺台灣實際可見僅約25顆。