【Emily】宏福災後一月 愛協放籠奇蹟救兩貓

【明報專訊】大埔宏福苑火災後，受災除咗居民，亦有唔少寵物同主人失散。愛護動物協會噚日喺facebook公布好消息，喺火災一個月後「奇蹟再次出現」，先後喺聖誕節當日同元旦日一共搵番兩隻生還貓貓。主人羅太同Emily確認，佢哋嘅5歲貓貓「細佬」喺元旦獲救，感謝幫忙尋貓同參與救援嘅所有義工、愛協人員同埋喺「細佬」獲救後幫手做檢查嘅醫生等等，形容好開心、好感恩，新年願望實現咗，可以一家團聚。

愛協話，佢地喺聖誕前夕終於獲得批准，可以喺宏仁閣擺放小量捕貓籠同埋攝錄機，喺聖誕節當日有第一隻貓入籠，呢隻貓貓即時送咗去愛協中心檢查，身體冇大問題，已被主人接走。去到2026年第一日，佢哋再捕得一隻。愛協話，警方𠵱家批准佢哋下星期喺另外5座大廈擺放捕貓籠，希望可以繼續搵到更多仍然失蹤嘅貓貓，再帶多啲好消息畀大家。

愛協話，宏福苑火災現場至噚晚為止一共發現519隻動物，368隻生還、151隻離世。