【Emily】30年集體回憶《宣傳易》幕終

【明報專訊】1996年8月6日起首播嘅翡翠台廣告節目《宣傳易》，經典廣告畫面同標語為港人帶嚟唔少集體回憶，由清潔用品嘅「認住金寶鐘，清潔好輕鬆」、「景鴻顧問、移民權威」去到「得成女傭，融入家中」都膾炙人口。不過Emily睇番翡翠台元旦起嘅節目表，就唔再見到每日有《宣傳易》環節，唔少網民都惋惜。TVB回覆話《宣傳易》已告一段落。

TVB企業傳訊助理總經理黃德慧回覆Emily話，過往《宣傳易》係由另一廣告公司製作，𠵱家所有廣告由TVB直接營運，喺過去幾個月同廣告製作公司已交接，而相關廣告客戶將會繼續支持TVB。

所有廣告交TVB直接營運

翻查網頁，《宣傳易》一直由凌速傳播有限公司管理負責，主要同TVB合作，特別為中小型客戶提供廣告時段同廣告製作服務。去到上年尾，廣告客戶繼續多元，由律師樓、貸款公司、成藥、食肆、參茸行、棚業工程都有。

《宣傳易》成為近30年經典，每節大約5分鐘、每隻廣告大約10至20秒，停播前嘅最後周五，全日播放節目5次，覆蓋朝早、中午、下午去到深宵時分；周末就每日播放3次。視乎播放時段同長度，每次播放廣告費由140元到6860元不等。