Emily Online｜卓永興讚1976年《CID》為「神劇」　受劇集啟發投身警隊　 (16:08)

政務司副司長卓永興今日（1日）喺「油麻地警署光影之旅」展覽開幕禮致辭時表示，想藉機向大家介紹1976年播映嘅電視劇《CID》，並形容為「神劇」，提及自己中五睇完劇之後令佢有意投身警隊。

卓永興話，一向公開場合都有稿，不過今日元旦輕鬆啲，「今日有好多別具特色嘅表演，我都係表演一部分，所以我又加少少驚喜畀大家」，於是佢就脫稿講一陣，並介紹一套隱蔽嘅神劇，笑言連保安局長鄧炳強都唔知道，「證明佢以前讀書好乖，平時好少睇電視」。

卓永興望向開幕禮嘉賓之一嘅本地影星任達華，指任有份出演電視劇《CID》，呢套戲啟發佢有意投身警隊，又話自己上過CID培訓班，但可能做得唔太好，就無去做CID。

卓永興1981年加入政府，先係任職警務督察，1984年再轉職政務主任。