【Emily】介紹1976年「神劇」《CID》 卓永興：令我投身警隊

【明報專訊】副政務司長卓永興噚日喺「油蔴地警署光影之旅」展覽開幕禮致辭時，趁機介紹1976年播映嘅電視劇《CID》（刑事偵緝處嘅英文簡稱），開幕禮嘉賓任達華有份演出。卓永興形容此為「神劇」，話自己讀中五時睇完呢齣劇之後令佢有意投身警隊。

卓永興話，適逢元旦想大家輕鬆啲，「今（噚）日有好多別具特色嘅表演，我都係表演嘅一部分，所以我又加插少少驚喜畀大家」，於是佢就「脫稿」介紹《CID》，講笑話連保安局長鄧炳強都唔知道呢齣劇，「證明佢以前讀書好乖，平時好少睇電視」。

卓永興透露早年做警察時上過CID培訓班，「但可能上得唔太好，就無去做CID」，之後感受到「長江後浪推前浪」，1984年決定轉職政務職系，笑言「後浪」就係鄧炳強1987年加入警隊，「我都無得企，快啲走」。