【Emily】嚴剛宣誓唔用廣東話 林琳無舉右手

【明報專訊】新一屆立法會議員噚日宣誓。除咗商界（三）嚴剛，全部議員都用廣東話宣誓，不過睇番上屆，嚴剛係用廣東話宣誓嘅。宣誓期間幾乎所有議員都舉起右手，唯獨選委界別林琳無舉到，佢上屆宣誓時有舉手。據政府發出嘅《宣誓須知》，舉右手唔係法定要求，但舉右手係同特首、特區政府主要官員、第七屆立法會議員宣誓就職時嘅「普遍做法」一致。

今屆唔少議員揀咗宗教方式宣誓，包括新界西北周浩鼎，法律界陳曉峰，社福界陳文宜，紡織及製衣界陳祖恒，選委界別梁美芬、陳仲尼、簡慧敏、鄧銘心、管浩鳴、蘇紹聰、莊家彬、李家駒，分別用咗基督教或天主教形式宣誓。

江旻憓：積極學習 為大家多服務

另外，過去少答記者提問嘅旅遊界江旻憓，喺大合照環節後被傳媒問到新一年目標，佢話會「繼續服務香港」，並引述誓辭承諾「廉潔奉公、盡忠職守」，又話正積極學習同會見業界，「希望為大家、為香港多啲服務」。宣誓儀式開始前，江旻憓座位鄰近官員席，多個官員主動上前同「劍后」握手交談，包括文體旅局長羅淑佩，兩人密密傾咗幾分鐘，其間江微笑點頭。