【Emily】嘉道理農場安頓近60災民 仲顧埋災寵

【明報專訊】噚日係大埔宏福苑火災發生滿一個月，嘉道理農場暨植物園喺社交平台分享，由該機構管理嘅綠匯學苑，喺火災當日接待咗21個宏福苑居民，其後嘉道理農場同港大合作開放埋嘉道理中心，截至今個月中，協助安頓咗超過58人。除咗臨時住宿，學苑每星期都舉辦身心靈活動，希望同大家共同療癒。

嘉道理農場承諾，喺嘉道理慈善基金會資助下，兩個臨時居所會運作至少6個月，相信畀居民留喺熟悉嘅大埔社區，將有助佢哋重建生活。

宏福苑嘅災民除咗「人」仲有寵物，嘉道理農場亦同愛護動物協會合作，照顧火災中受影響嘅動物，目前正護理受暫時安置一隻寵物龜，隻龜仍要接受獸醫護理，完全康復就可以返主人身邊。

嘉道理農場提到，災難後嘅復康路漫長，心靈創傷同樣不容忽視，於是安排咗有社會服務背景嘅員工支援宏福苑居民，並同慈善團體MindHK等不同領域嘅專業人士合作，為居民提供心理支援。