【Emily】李家超聖誕祝市民平安順遂

【明報專訊】噚日係聖誕節，特首李家超按慣例喺facebook出post發表賀辭。呢個聖誕同時係大埔宏福苑大火發生一個月，李家超今年無祝大家聖誕快樂，但就祝福全港市民平安順遂，又呼籲大家向身邊人傳遞祝福，令每個人都感受到關心。

林定國邀基層童去官邸玩

律政司長林定國亦喺facebook分享聖誕祝福，佢先祝大家節日快樂，然後提到上周末喺聖公會麥理浩夫人中心支持下，請咗22個來自葵青區、6至11歲嘅基層小朋友去佢官邸玩遊戲、抽獎同聚餐，勞福局長孫玉菡同佢太太都有參與。林話一齊玩遊戲帶出咗必須守規矩、唔做違法嘢嘅價值觀，亦都加入咗簡單時事常識問答，話唔少小朋友嘅回答都相當出色。

林定國又分享，當日其中一個溫馨環節係請小朋友寫心意卡掛喺聖誕樹，有小朋友話希望有新手機，有啲話將來要做律師甚至係律政司長，有個小女孩就許願話希望同佢做好朋友，令佢覺得好窩心。林定國又話，呢班小朋友唔少係未去過山頂，所以對官邸好有興趣，仲問佢係唔係要坐直升機返工。佢話雖然只相聚幾個鐘，但活動可以擴闊小朋友嘅眼界，十分值得。