【Emily】日本國際漫畫獎 3港漫摘銅

【明報專訊】第十九屆日本國際漫畫獎公布賽果，香港漫畫家有3部作品獲銅獎，包括蘇頌文（Pen So）嘅《達利書店》（圖左起）、曹志豪（Jerry）同蔡潔（Jacky）合著嘅《失敗的我被放上置物架》，同埋廖光祖（Linus）嘅《三腳鴉》。

Jerry喺Instagram發帖話獲獎係「收到一份最好的聖誕禮物」。Pen So提到佢作品嘅創作初衷係「希望提醒大家記住自己真正的想法，不向現實低頭，不要找放棄的藉口」。Linus回覆Emily時就話感覺到好意外，當知道有3部香港漫畫作品嘅畫家同時獲獎就更開心。

《達利書店》以100年後實體書店沒落為背景，講述書店店長獲得神秘力量後，用超能力經營書店嘅故事。《失敗的我被放上置物架》描述一個女子因網暴而事業崩塌，墮入異世界後，旅途中遇到曾經影響佢生命嘅角色。《三腳鴉》故事希望令讀者反思同家人嘅溝通同聯繫。

日本國際漫畫獎由2007年5月起每年舉行，以表彰外籍漫畫家，今屆有15部作品入圍，來自巴西、沙特阿拉伯、越南、台灣、西班牙、法國、俄羅斯、泰國及香港，設有1項金獎、3項銀獎、1項獎勵獎及10項銅獎。