【Emily】伊院聖誕送暖 准早產B影全家福

【明報專訊】聖誕係慶祝耶穌誕生、大家互送祝福嘅日子，但對於早產或有特別需要嘅BB，佢哋要喺新生嬰兒深切治療部留醫，因為考慮到感染控制，院方通常只會畀父母其中一人輪流入病房睇BB，其他家人就要喺BB身體情况合適下先可以見面，令一家人未能同場慶節。為咗畀家人可以同BB一齊溫馨過節，伊利沙伯醫院（QE）嘅醫護同互助組織特別佈置病房，畀留醫BB同家人一家喺聖誕前夕合照留念。

QE噚日喺facebook專頁上載多張留院BB同父母等家人嘅合照，睇到病房做咗簡單嘅聖誕佈置，BB同爸爸媽媽一齊戴住聖誕帽或頭飾，一家人笑容滿面，相當溫馨。今次安排係QE兒科、病人資源中心、QE兒科早產嬰孩家長互助組織「家友愛」同埋攝影師，喺聖誕節前夕夾手夾腳促成嘅美事。

帖文引述幾個媽媽嘅感受，話今次嘅經驗好珍貴同好難得。QE病人資源中心主任鍾振邦話，今年係佢哋第二次舉辦類似活動，有8個家庭參加。佢話父母都希望記錄BB成長，因此喺可行情况下，都希望畀到祝福小朋友、畀到希望家人。